LEONA FLORENTINO AWARD

(PAMMADAYAW LEONA FLORENTINO)

Ti Leona Florentino Award ti kangatuan a pammadayaw nga ipapaay ti GUMIL Filipinas, ti gunglo dagiti mannurat nga Ilokano iti Filipinas ken Ballasiw-Taaw, kadagiti mannurat nga Ilokana, sibibiag wenno pimmusayen, a nakaipaay iti naisangsangayan a gapuanan— sinurat wenno tignay– iti pannakapadur-as ti Literatura Ilokana. Imatonan daytoy ti Awards Committee ti GUMIL Filipinas a buklen ti lima a kameng ken pagpaayan ti Presidente ti gunglo kas ex-officio a kameng.

1. NAMUNGANAYAN

1.1 Naipanagan iti daydi Leona Florentino, mabigbigbig nga Ina (?) ti Kurditan Samtoy, narugian ti pannakaipaay ti Leona Floretino Award idi 1976 tapno maipaay ti mayataday a pammadayaw kadagiti mannurat nga Ilokana a nakaipaay iti naisangsangayan a kontribusion para iti Literatura Ilokana. Naipaay ti damo a pammadayaw ken ni Doña Josefa Edralin Marcos.

1.2 Ti Awards Committee ti mangimaton iti Leona Florentino Award kasta met kadagiti pribilehio ken pammadayaw kadagiti Leona Florentino Awardees.

2. DAGITI PANGGEP

Nainaw ti Leona Florentino Award gapu kadagiti sumaganad a panggep:

2.1 Ti mangipaay iti mayataday a pammadayaw kadagiti Ilokana a mannurat a nakayam-ammo ti naganda ken nakaipaay iti naisangsangayan a kontribusion iti kurditan dagiti Ilokano.

2.2 Ti mangbigbig ken mangitampok iti naisangsangayan a gapuanan ti kinamanagpartuat ni Ilokano ken ti mangitandudo iti literatura kas napateg a paset iti pannakapadur-as ti kultural nga identidad ti Ilokandia.

3. DAGITI PAMMADAYAW KEN PRIBILEHIO

Dagiti sumaganad a pammadayaw ken pribilehio ti maipaay kadagiti Leona Florentino Awardees:

3.1 Medalion, sitasion ken tropeo/plake a Leona Florentino;

3.2 Naisangrat a naisalsalumina a lugar kadagiti miting ken kombension ti gunglo, ken dadduma pay a pasken ti gunglo.

4. KRITERIA ITI PANAGPILI

Maipaay ti Leona Florentino Award kadagiti sumaganad:

4.1 Sibibiag ken pimmusayen nga Ilokana a mannurat, makipagili man wenno saan iti Filipinas.

4.2 Mannurat nga Ilokana a nangitandudo iti identidad ken dignidad dagiti Ilokano babaen ti anag ken langa ti sinurat wenno insayangkatda a tignay-literatura.

4.3 Mannurat a naam-ammo babaen ti ania man kadagiti sumaganad:

4.3.1 Panagsukisok, panangtaginayon, ken/wenno agtultuloy a panangusar iti maysa a kita ti Literatura Ilokana;

4.3.2 Panangitandudo iti agtultuloy a pannakapadur-as iti tradisional a kita ti Literatura Ilokana babaen ti agtultuloy nga inobasion ken panageksperimento, tapno agbalin daytoy a makaay-ayo iti agdama nga agbasbasa wenno agbuybuya nga Ilokano.

4.3.3 Panangpundar, wenno panangusat iti dana para, iti baro a wagas wenno panagdur-as iti maysa a kita ti literatura, a namagparnuay ngarud iti kidag iti pannakapadur-as dayta a kita ti literatura kas iwaywayat ti mannurat wenno dagiti sumarsaruno kenkuana a mannurat.

4.4 Mannurat a nakapartuat iti napuskol a bagi ti sinurat ken/wenno agtultuloy a nakaipamatmat iti kinalaing iti panagsursuratna iti pilina a tay-ak ti literatura, a nakagun-odanna ngarud iti napateg a kontribusion iti agtultuloy a panagdur-as dayta a pilina a tay-ak ti literatura; ken

4.5 Mannurat a pagrukbaban ken respetaren ti kaaduan kadagiti kakaduana, dagiti kritiko, ken ti Ilokandia, a daytoy a panangbigbig ket maipamatmat iti uray ania man kadagiti sumaganad:

4.5.1 Mabigbigbig a pammadayaw manipud kadagiti lokal, rehional, nasional ken/wenno internasioal a gunglo;

4.5.2 Pammadayaw manipud kadagiti mabigbigbig a salip iti panagsuratan iti rehional, nasional, ken/wenno internasional.

4.5.3 Nainsiriban a pananglugay ken/wenno positibo a pannakarepaso ken pannakakritikar dagiti gapuananna.

5. PROSESO TI NOMINASION

5.1 Mapili ti/dagiti Leona Florentino Awardee/s manipud kadagiti indibidual a nainominar kas mayataday kadagitoy a pagalagadan.

5.2 Dagiti sumaganad a kita ti literatura a mabalin a pakapilian ti nominado. Mabalin a mainominar ti kandidata iti maysa wenno ad-adu pay a kita ti literatura.

5.2.1 Daniw – tradisional wenno kabaruanan a kita.

5.2.2 Piksion— sarita ken/wenno nobela a prosa ken/wenno komiks.

5.2.3 Salaysay – personal wenno artikulo.

5.2.4 Drama – iti radio, magasin wenno dadduma pay a babasaen.

5.2.5 Kinaagiwarwarnak – iti radio, magasin wenno dadduma pay a babasaen.

5.3 Ti nominasion para iti Leona Florentino Award ket idatag ti ania man kadagiti chapter ti GUMIL Filipinas wenno asino man kadagiti naipaayanen iti Leona Florentino Award.

5.4 Maawat laeng dagiti nominasion no naidatag babaen ti surat ken nalukonan iti mayataday a pangsurpota a dokumento, a pakairamanan ti:

5.4.1 Kangrunaan a surat (cover letter) a pinirmaan ti presidente ti chapter a nanginominar wenno ti nadutokan a mangibagi kenkuana, wenno ti Leona Florentino Awardee a naginominar. Iti biang ti chapter, mapakuyogan ti kangrunaan a surat iti Board Resolution a nangaprobar iti nominado a dakdakamaten ti nasao a resolusion ken pinirmaan ti Presidente ti chapter ken sinertipikaran ti Sekretario ti chapter.

5.4.2 Detalyado a curriculum vitae ti nainominar (innem a kopia);

5.4.3 Listaan dagiti kangrunaan a sinurat (innem a kopia) agraman dagiti detalye ti pannakaipablaakda;

5.4.4 Kaudian a ladawan ti nainominar, saan a basbassit ngem 5” x 7”; nairekord iti video/audio a trabaho ti nainominar; ken dadduma pay a napapateg a material ti impormasion a mabalin a makatulong iti proseso ti panagpili.

5.4.5 Kopia dagiti naipablaak a pannakarepaso wenno pannakakritikar ti gapuanan ti nominado wenno kopia ti sinurat nga ibilang ti nominado a kangrunaan a gapuananna (innem a kopia).

5.4.6 Photocopy ti Death Certificate dagiti pimmusayen a mannurat, wenno surat-pangbigbig (iti pannakainominarna) manipud iti uray asino kadagiti kameng ti kaamaan.

5.5 Saan a maawat ti nominasion a simmangpet kalpasan ti naituding a gibus (deadline) iti panagidatag iti nominasion.

5.6 Maipakaammo ti pannakaawat ti nominasion babaen ti e-mail ken/wenno koreo kasta met a babaen dagiti damdamag kadagiti website, magasin, ken dadduma pay a babasaen.

5.7 Saan a mapalubosan a mangidatag iti nominasionda dagiti kameng ti Awards Committee.

5.8 Amin a nominasion, masapul a maidatag iti:

LEONA FLORENTINO AWARD SECRETARIAT

c/o ARIEL S. TABAG

B2 L4 Q.C. Ville Subdivision, Central Avenue

Culiat, Quezon City

6. PROSESO TI PANAGPILI

6.1 Dagiti nominasion ket arisiten ti Leona Florentino Award Secretariat a binukel wenno dinesignar ti Awards Committee. Ti pagibasaran iti panagarisit ket ti teknikal a pagalagadan iti babaen ti kriteria ti LFA, pakairamanan ti kina-Ilokana ti nominado. Saan a maibasar ti panagarisit kadagiti gapuanan ti nominado.

6.2 Maiwayat ti Umuna a Deliberasion kadagiti nominado a nakapasa iti panagarisit kas maibatay iti teknikal a pagalagadan. Ti panggep ti Umuna a Deliberasion ket ti mangisagana iti short list dagiti nominado a makapasa iti kriteria ti LFA. Maipakaammo ti short list iti Hunta Direktiba.

6.3 Ti Umuna a Deliberasion nga iturong ti chairman ti Awards Committee ket iwayat dagiti sumaganad:

6.3.1 Ti chairman ti Awards Committee;

6.3.2 Dagiti uppat a kameng ti Awards Committee;

6.3.3 Ti Presidente ti gunglo nga agpaay nga ex-oficio a kameng.

6.4 Maiwayat ti Maikadua a Deliberasion tapno mapili ti maipaayan iti Leona Florentino Award manipud iti short list a naisagana iti Umuna a Deliberasion.

6.5 Maikeddeng iti Maikadua a Deliberasion no mano ti maipaayan iti Leona Florentino Award ken mabalin met a maikeddeng nga awan ti pakaipaayan ti pammadayaw no awan ti makita kadagiti nominado a maikari. Mangabak ti kandidata a maipaayan iti ad-adu ngem kagudua a butos dagiti kameng ti Komite, malaksid iti butos ti Presidente nga ex-officio a kameng.

6.6 Ipakaammo ti Awards Committee ti resulta ti Maikadua a Deliberasion iti Espesial a Miting ti Hunta Direktiba ti GUMIL Filipinas.

6.7 Maiwaragawag ti nagan ti napili babaen ti opisial a surat wenno e-mail ti Sekretario Heneral, paskil iti www.gumilfilipinas.com, ken damdamag kadagiti nadumaduma a magasin wenno pagiwarnak.

7. PANNAKAYAWAT TI PAMMADAYAW

7.1 Ti Leona Florentino Award ket iputong ti Presidente ti GUMIL Filipinas iti maudi a rabii ti Kombension Nasional ti gunglo.

7.2 Mayawat iti Leona Florentino Awardee ti medalion, sitasion ken plake/tropeo iti nasao a pasken.

8. PANNAKAIMATON TI PAMMADAYAW

8.1 Ti Awards Committee ti mangplano, mangorganisar, ken mangyimplimentar iti Leona Florentino Award.

8.2 Dawaten met ti Awards Committee ti suporta ken pannakikammaysa dagiti pangamaen iti gunglo ken iti gimong dagiti Ilokano tapno masigurado a mayimplimentar ti pammadayaw a sibaballigi ken awan an-anakenna.

8.3 Amin a saludsod mainaig iti Leona Florentino Award, agsaludsod iti:

LEONA FLORENTINO AWARD SECRETARIAT

c/o ARIEL S. TABAG

B2 L4 Q.C. Ville Subdivision, Central Avenue

Culiat, Quezon City

E-mail: gumil.filipinas@gmail.com

Selpon: 0918-745-8792

9. TIMETABLE (para iti LFA 2011)

Pebrero 1, 2011 – Pannakaipakaammo ti panagawat iti nominasion.

Pebrero 28, 2011 – Gibus (deadline) ti panagawat iti nominasion.

Marso 1-Marso 5, 2011 – Panagsukisok, panagberipika, ken panagarisit iti

nominasion.

Marso 6, 2011 – Umuna a deliberasion. Maiwayat iti Currimao, Ilocos Norte kalpasan ti pannakairikep ti Pasnaan 2011.

Marso 13, 2011 – Maikadua a deliberasion. Pannakaipakaammo iti Hunta Direktiba ti GUMIL Filipinas ti resulta. Maangay iti pakasangailian ti Maudi wenno Maikawalo a Board Meeting ti GF Term 2009-201

Marso 13, 2011 – Pannakaipakaammo iti publiko ken kadagiti maseknan ti resulta.

Abril 9, 2011 – Seremonia ti Pammadayaw iti Leona Florentino Awardee 2010 iti maudi a rabii ti kombension nasional. Iti aldaw sakbayna, aglektiur daytoy.

10. DAGITI LEONA FLORENTINO AWARDEES:

2010 Marlene J. Tolentino

2009 Elizabeth Madarang-Raquel

2008 Ruperta VR. Asuncion

2007 Cresencia Robianes-Alcantara

2005 Gladys Menor

2002 Dr. Onofrecia I. Ibarra

1994 Mrs. Crispina B. Bragado

Mrs. Estela Rimorin-Gordo

Mrs. Luz Flores Bello

1993 Dr. Dedicacion A. Reyes

1978 Mrs. Pacita Saludes

Mrs. Manuela R. Ablan

1976 Doña Josefa Edralin Marcos

Daytoy a pagalagadan, suktannan dagiti immun-una a pagalagadan.

Insagana ti GF Awards Committee 2009-2011:

Fernando B. Sanchez – Chairman

Ariel S. Tabag – Co-chairman

Jose A. Bragado – Member

Arsenio Cortes – Member

Juan S.P. Hidalgo Jr. – Member

Elizabeth M. Raquel – Ex-officio Member