DON CORNELIO VALDEZ AWARD
Ti Don Cornelio Valdez Award ti pammadayaw nga ipapaay ti GUMIL Filipinas, ti gunglo dagiti mannurat nga Ilokano iti Filipinas ken Ballasiw-Taaw, kadagiti kamengna, sibibiag wenno pimmusayen, a nakaipaay iti naisangsangayan a gapuanan para iti isasantak ti gunglo. Imatonan daytoy ti Awards Committee ti GUMIL Filipinas a buklen ti lima a kameng ken pagpaayan ti Presidente ti gunglo kas ex-officio a kameng.
1. NAMUNGANAYAN
1.1 Naipanagan iti daydi Don Cornelio Valdez, mannaniw a tubo ti Luna, La Union ken nangbuangay idi 1923 iti umuna a grupo dagiti mannurat nga Ilokano—napanaganan iti Gimong Dagiti Umiiluko—narugian ti pannakaipaay ti Don Cornelio Valdez Award idi 1992 tapno maipaay ti mayataday a pammadayaw kadagiti kameng ti GUMIL Filipinas nakaipaay iti naisangsangayan a gapuanan iti isasantak ti gunglo. Napagbalin a Bannatiran Award idi 2008 ken 2009 sa naisubli met laeng a Don Cornelio Valdez itoy 2010. Naipaay ti damo a pammadayaw kada Juan S.P. Hidalgo Jr ken Pelagio A. Alcantara.
1.2 Ti Awards Committee ti mangimaton iti Don Cornelio Valdez Award kasta met kadagiti pribilehio ken pammadayaw kadagiti Don Cornelio Valdez Awardees.
2. DAGITI PANGGEP
Nainaw ti Don Cornelio Valdez Award gapu kadagiti sumaganad a panggep:
2.1 Ti mangipaay iti mayataday a pammadayaw kadagiti kameng ti GUMIL Filipinas a nakaaramid iti naisangsangayan a gapuanan para iti agtultuloy a panagsantak ti gunglo.
3. DAGITI PAMMADAYAW KEN PRIBILEHIO
Dagiti sumaganad a pammadayaw ken pribilehio ti maipaay kadagiti Don Cornelio Valdez Awardees:
3.1 Sitasion ken tropeo/plake a Don Cornelio Valdez;
3.2 Naisangrat a naisalsalumina a lugar kadagiti miting ken kombension ti gunglo, ken dadduma pay a pasken ti gunglo.
4. KRITERIA ITI PANAGPILI
Maipaay ti Don Cornelio Valdez Award kadagiti sumaganad:
4.1 Sibibiag wenno pimmusayen a kameng ti GUMIL Filipinas, makipagili man wenno saan iti Filipinas.
4.2 Kameng ti GUMIL Filipinas nga awan sardayna a makipagmulmuli kadagiti gannuat para iti agtultuloy a panagsantak ti GF.
4.3 Pagwadan a kameng ti GUMIL Filipinas babaen ti panangipakitana ti umno a kababalin ti maysa a nanakman a mannurat ken kas kameng ti GF.
4.4 Kameng ti GUMIL Filipinas a pagrukbaban ken respetaren ti kaaduan kadagiti kakaduana, ken ti sangkagimongan nga Ilokandia.
5. PROSESO TI NOMINASION
5.1 Mapili ti/dagiti Don Cornelio Valdez Awardee/s manipud kadagiti indibidual a nainominar kas mayataday kadagitoy a pagalagadan.
5.2 Ti nominasion para iti Don Cornelio Valdez Award ket idatag ti ania man kadagiti chapter ti GUMIL Filipinas wenno asino man kadagiti naipaayanen iti Don Cornelio Valdez wenno Bannatiran Award.
5.3 Maawat laeng dagiti nominasion no naidatag babaen ti surat ken nalukonan iti mayataday a pangsurpota a dokumento, a pakairamanan ti:
5.4.1 Kangrunaan a surat (cover letter) a pinirmaan ti presidente ti chapter a nanginominar wenno ti nadutokan a mangibagi kenkuana, wenno ti Don Cornelio Valdez Awardee a naginominar. Iti biang ti chapter, mapakuyogan ti kangrunaan a surat iti Board Resolution a nangaprobar iti nominado a dakdakamaten ti nasao a resolusion ken pinirmaan ti Presidente ti chapter ken sinertipikaran ti Sekretario ti chapter.
5.4.2 Detalyado a curriculum vitae ti nominado (innem a kopia);
5.4.3 Listaan dagiti kangrunaan a sinurat (innem a kopia);
5.4.4 Kaudian a ladawan ti nominado, saan a basbassit ngem 5” x 7”; ken dadduma pay a napapateg a material ti impormasion a mabalin a makatulong iti proseso ti panagpili.
5.5 Saan a maawat ti nominasion a simmangpet kalpasan ti naituding a gibus (deadline) iti panagidatag iti nominasion.
5.6 Maipakaammo ti pannakaawat ti nominasion babaen ti e-mail ken/wenno koreo kasta met a babaen dagiti damdamag kadagiti website, magasin, ken dadduma pay a babasaen.
5.7 Saan a mapalubosan a mangidatag iti nominasionda dagiti kameng ti Awards Committee.
5.8 Amin a nominasion, masapul a maidatag iti:
DON CORNELIO VALDEZ AWARD SECRETARIAT
c/o ARIEL S. TABAG
B2 L4 Q.C. Ville Subdivision, Central Avenue
Culiat, Quezon City
6. PROSESO TI PANAGPILI
6.1 Dagiti nominasion ket arisiten ti Don Cornelio Valdez Award Secretariat a binukel wenno dinesignar ti Awards Committee. Ti pagibasaran iti panagarisit ket ti teknikal a pagalagadan iti babaen ti kriteria ti Don Cornelio Valdez Award, pakairamanan ti kasasaad kas kameng ti GF ti nominado.
6.2 Maiwayat ti Umuna a Deliberasion kadagiti nominado a nakapasa iti panagarisit kas maibatay iti teknikal a pagalagadan. Ti panggep ti Umuna a Deliberasion ket ti mangisagana iti short list dagiti nominado a makapasa iti kriteria ti Don Cornelio Valdez Award. Maipakaammo ti short list iti Hunta Direktiba.
6.3 Ti Umuna a Deliberasion nga iturong ti chairman ti Awards Committee ket iwayat dagiti sumaganad:
6.3.1 Ti chairman ti Awards Committee;
6.3.2 Dagiti uppat a kameng ti Awards Committee;
6.3.3 Ti Presidente ti gunglo nga agpaay nga ex-oficio a kameng.
6.4 Maiwayat ti Maikadua a Deliberasion tapno mapili ti maipaayan iti Don Cornelio Valdez Award manipud iti short list a naisagana iti Umuna a Deliberasion. Saan a maibasar ti panagpili ti kabaelan ti nominado kas maysa a mannurat.
6.5 Maikeddeng iti Maikadua a Deliberasion no mano ti maipaayan iti Don Cornelio Valdez Award ken mabalin met a maikeddeng nga awan ti pakaipaayan ti pammadayaw no awan ti makita kadagiti nominado a maikari. Mangabak ti kandidato a maipaayan iti ad-adu ngem kagudua a butos dagiti kameng ti Komite, malaksid iti butos ti Presidente nga ex-officio a kameng.
6.6 Ipakaammo ti Awards Committee ti resulta ti Maikadua a Deliberasion iti Espesial a Miting ti Hunta Direktiba ti GUMIL Filipinas.
6.7 Maiwaragawag ti nagan ti napili babaen ti opisial a surat wenno e-mail ti Sekretario Heneral, paskil iti www.gumilfilipinas.com, ken damdamag kadagiti nadumaduma a magasin wenno pagiwarnak.
7. PANNAKAYAWAT TI PAMMADAYAW
7.1 Ti Don Cornelio Valdez Award ket iputong ti Presidente ti GUMIL Filipinas iti maudi a rabii ti Kombension Nasional ti gunglo.
7.2 Mayawat iti Don Cornelio Valdez Awardee ti sitasion ken plake/tropeo iti nasao a pasken.
8. PANNAKAIMATON TI PAMMADAYAW
8.1 Ti Awards Committee ti mangplano, mangorganisar, ken mangyimplimentar iti Don Cornelio Valdez Award.
8.2 Dawaten met ti Awards Committee ti suporta ken pannakikammaysa dagiti pangamaen iti gunglo ken iti gimong dagiti Ilokano tapno masigurado a mayimplimentar ti pammadayaw a sibaballigi ken awan an-anakenna.
8.3 Amin a saludsod mainaig iti Don Cornelio Valdez Award, iturong iti:
DON CORNELIO VALDEZ AWARD SECRETARIAT
c/o ARIEL S. TABAG
B2 L4 Q.C. Ville Subdivision, Central Avenue
Culiat, Quezon City
E-mail: gumil.filipinas@gmail.com
Selpon: 0918-745-8792
9. TIMETABLE (para iti 2011 Don Cornelio Valdez Award)
Pebrero 1, 2011 – Pannakaipakaammo ti panagawat iti nominasion.
Pebrero 28, 2011 – Gibus (deadline) ti panagawat iti nominasion.
Marso 1-Marso 5, 2011 – Panagsukisok, panagberipika, ken panagarisit iti
nominasion.
Marso 6, 2011 – Umuna a deliberasion. Maiwayat iti Currimao, Ilocos Norte kalpasan ti pannakairikep ti Pasnaan 2011.
Marso 13, 2011 – Maikadua a deliberasion. Pannakaipakaammo iti Hunta Direktiba ti GUMIL Filipinas ti resulta. Maangay iti pakasangailian ti Maudi wenno Maikawalo a Board Meeting ti GF Term 2009-201
Marso 13, 2011 – Pannakaipakaammo iti publiko ken kadagiti maseknan ti resulta.
Abril 9, 2011 – Seremonia ti Pammadayaw iti 2010 Don Cornelio Valdez Awardee iti maudi a rabii ti kombension nasional.
10. DAGITI DON CORNELIO VALDEZ AWARDEES:
1993 Cristino I. Inay
Atty. Benjamin M. Pascual
1992 Juan S. P. Hidalgo Jr.
Pelagio A. Alcantara
Daytoy a pagalagadan, suktannan dagiti immun-una a pagalagadan.
Insagana ti GF Awards Committee 2009-2011:
Fernando B. Sanchez – Chairman
Ariel S. Tabag – Co-chairman
Jose A. Bragado – Member
Arsenio Cortes – Member
Juan S.P. Hidalgo Jr. – Member
Elizabeth M. Raquel – Ex-officio Member