Ni Ansuan ken ti Unibersidad ti Bannawag
Ni JUAN S.P. HIDALGO, JR.
ITI bilangna inton Nobiembre 2, 2009, selebraran ti Bannawag ti maika-75 a panagkasangayna. Daytoy ti kunkunada a Diamond Jubilee. Scorpio ti signo ti Bannawag. Fighter ti Scorpio. Dina kayat ti mailupitlupit, awan kettatanna, natibker, ken nasaririt. Nabara pay nga agayat, napudno, ken heneroso. Maymaysa ti awagda kenkuana: Malalaki.
Ket dayta a signo ken espiritu ti kinamalalaki ti nangbalkut, mangbalbalkut ken manglaplapunos agingga ita iti Bannawag. Umno laeng nga ilalaen, tagipatgen, ken ay-ayaten.
Manipud 1934 a pannakaipasngay ti Bannawag, agingga iti 2009, adu nga editor ti nagsisinnublat a nangtimon iti panaglayagna kadagiti tawen; adu a mannurat ti nangibinglay kadagiti saririt, talento, tiempo, pigsa, ken kuartada tapno agtultuloy a maipablaak a linawas, ken mangliwliwa ken mangpasirib pay kadagiti Ilokano a mangbasbasa itoy.
Nagasat dagiti Ilokano ta adda Bannawag a mangtagtaginayon ken mangpabpabaknang iti lengguahe, literatura, ken kulturada. Nagasat dagiti Ilokano ken ti Bannawag ta adda dagiti mannurat nga Ilokano, a nupay Ingles ken Tagalog ti ad-adda nga inyadal dagiti pagadalan kadakuada, naamirisda a dakkel ti akemda iti panagsuratda iti bukodda a lengguahe ken mangpabaknang pay iti literatura ken kultura ni Ilokano. Ken nagasat dagiti Ilokano ta adda dagiti editor ti Bannawag a naanus ken nasaririt a nangbaybayabay ken mangbaybayabay kadagiti mannurat iti laksid ti kaawan ti pagadalan iti amianan a mangisuro iti panagsurat iti sarita, daniw, salaysay, nobelita, nobela, ken drama; ken, iti laksid ti kaawan dagiti libro a pagadalan dagiti mannurat kadagiti library ken bookstore dagiti munisipio, siudad, ken kabesera, dagiti haiskul, kolehio, ken unibersidad.
Iti ababa a pannao, tiBannawag ti nagbalin a library, bookstore, ken eskuelaan dagiti mannurat nga Ilokano, ket dagiti editor ti Bannawag ti nagbalin a titserda.
Nagasat met dagiti pamilia nga Ilokano a manipud pay idi 1934 agingga iti agdama, di maaw-awan ti Bannawag iti balayda. Tallo-uppat a kaputotan dayta a mangbasbasa iti Bannawag. Dagitoy a pamilia ti “napeklan” a patron ti Bannawag. Ket agtultuloy ti panagaduda iti pannagna ti tiempo.
Nalabit saan a maamiris ti agbasbasa iti Bannawag, a nupay gagangay a mannalon, mangngalap, drayber ti dyipney, bus, traysikel, aglaklako iti tiendaan wenno karinderia, ken dadduma pay a panggedan, a nupay di nakalpas iti haiskul wenno kolehio, agtultuloy ti panagadalna iti nadumaduma a benneg ti pagsiriban babaen ti panagbasana iti nasao a magasin. Iti 52 nga isyu ti Bannawag iti makatawen, mano a sarita, daniw, nobelita, nobela ken drama ti mabasana? Mano a salaysay? Mano a nobela a naikomiks? No saggaysaen nga ilista dagiti topiko a trinatar dagiti linaon magasin, sinaknapda ti nakalawlawa a tay-ak ti pagsiriban. Kurangna la nga ibagatayon nga edukado ni Ansuan, ket ti “Unibersidad ti Bannawag” ti nagadalanna.
(Adda tuloyna)