Ni LEO S. FAGARAGAN
GUMIL Metro Manila
SUMAGMAMANO nga aldaw pay laeng sakbay Abril 11-12, 2009 a pannakaangay ti Maika-41 a Kombension Nasional ti GUMIL Filipinas, pinasiarmin ken Ariel S. Tabag ti ikub ti Our Lady of the Angels Seminary (OLAS) iti Novaliches, Quezon City tapno makabesadok ti lugar.
Dakami ngamin ti napusgan a chairman iti Accomodation and Lodging. Ammomi nga adu ti umatendar manipud kadagiti nadumaduma a chapter ti GUMIL itoy naisangsangayan a pasken dagiti mannurat a Saluyot ket saanmi a kayat nga adda dagiti malibtawanmi.
Sabali ti komite ni Ariel. Isu ti mangidaulo iti mismo a pannakaiwayat ti kombension. Ngem nagpakuyogkami ta ammona amin a suli ti lugar ta nagbasa iti nasao a seminario.
Inammomi ti kapasidad ken kalidad dagiti pasilidad ken aruaten a maaramat. Nalawa ken nadalus ti lobby iti ruangan ti umuna a pasdek. Addaan iti atiddog a lamisaan ket isun ti maaramat a Registration Center.
Nadalus met ti auditorium. Naglaon daytoy iti saan a nakurkurang ngem dua gasut a tugaw. Saan nga air-conditioned ngem nasalimeng ken nasalemsem ketdi ta malaksid kadagiti wall fan, nalawlaw pay ti pasdek iti naruay a kaykayo a paggapuan ti makasalibukag ken nakaprespresko nga angin.
Iti kabangibang a pasdek nga insilpo ti panglawaen a dalan iti umuna a pasdek isu ti nalawa ken nadalus a kantina nga aglaon iti saan a nakurkurang ngem sangagasut. Simmangkadalus met ti tallo kadsaaran a pasdek iti sango daytoy a pakaibalayan dagiti agsangpet a deligado. Apagisu ti dua a delegado iti kada siled ta adda double deck a katre. Adda met kabinet a pagyanan ti alikamen ken lababo a paglabaran. Sabali laeng dagiti siled nga aglaon iti sagninem ken addaan iti nadalus a rest room.
Tsek amin. Awanen ti parikutmi. Isu a nupay petsa 11 ti rugi ti programa ken naiwaragawag a mabalinen dagiti delegado ti sumangbay iti OLAS iti malem ti petsa 10, a Biernes, nalag-anen ti riknami a nagpasungad kadagiti delegado.
Ti delegado ti GUMIL Hawaii nga indauluan ni Manang Pacita ”Pacing” Saludes ti nangbusat iti listaan. Simmangpetda iti malem ti Abril 10. Kaduana da Apo Rosendo Raquedan ken Gloria a baketna, a Mrs. GUMIL Hawaii 2009; ni Mrs. Fely Cristobal a dati met laeng a Mrs. GUMIL Hawaii; ken Andrea Mendoza a Mrs. GUMIL Hawaii 2008, kdpy.
Awanen ti simmaruno. Adda sumagmamano a kameng ti GUMIL Ilocos Norte a nagsangpet ngem iti kabigatanna a nagparehistroda ta kunada a mapanda pay la pasiaren dagiti kakabagian ken papagayamda nga agnaed iti Manila, nambaranda metten a nag-shopping.
Kabigatanna, April 11, dagiti padak a kameng ti accommodation a da Sherma Benosa, Honey Tabag, Zita Fagaragan, Jake Ilac ken Jovy Amorin ti nagasikaso iti panagparehistro dagiti agsangpet a delegado. Naannayas ken naurnos ti panagparehistroda.
Binunonganda amin a nagparehistro a delegado iti press kit a naglaon iti Souvenir Program, Bannawag nga indonar da Appo Claire Sumahit ti GUMIL Baguio ken Orlando Pagdilao a dati a presidente ti GUMIL Greece, nadumaduma a magasin manipud iti NCCA ken ballpen.
Nasarsarutsot dagiti nagsangpet. Adda dagiti kameng ti GUMIL Ilocos Norte nga indauluan ni Elizabeth M. Raquel, ti GUMIL Cagayan nga indauluan ni Arthur Urata, ti GUMIL Pangasinan nga indauluan ni Manuel Diaz, ti GUMIL Nueva Vizcaya nga indauluan ni Ruperto Manuel, ti GUMIL Isabela nga indauluan ni Rizalino Viernes. Ni Claire Sumahit ti nangibagi iti GUMIL Baguio gapu iti saan a pannakatabuno ni Luvimin Aquino a presidenteda. Adda met da Ben Pacris, Rodie Taan ken dadduma a kameng ti GUMIL Ilocos Sur ngem saan a nakadar-ay ni Dr. Ed Angco a presidenteda. Kasta met ti GUMIL La Union, awan ti presidenteda a ni Djuna R. Alcantara.
Adda pay da Artemio Raguindin ken baketna a naggapu pay idiay Italy a nangyawat iti premio ken sertipiko dagiti napagasatan a nangabak iti Sta. RAFFAELLA Community Literary Awards nga es-esponsoranda.
Siempre, saan a naaw-awan dagiti kameng ti GUMIL Metro Manila a timmulong iti pannakaisagana ti kombension babaen ti panangidaulo ni Engr. Ansel D. Cargo.
Kalpasan ti nabaknang a pamigat, narugian a dagus ti programa.
Gapu ta kompletoda met iti registration table, simrekak iti auditorium a pakaangayan ti programa.
Napasnek ti panangidaulo ni Simeon Berroy iti kararag.
Naisaruno ti pannakakanta ti Nailian a Kanta (Ilokano Version) babaen ti panangiwanwan ni Avelina Fe Camacho a prinsipal ti Polangi Elementary School iti Bacarra, Ilocos Norte.
Sinaruno met daytoy ti pannakakanta ti GUMILAweng iti panangidaulo ti gumgumluong a boses ni Honor Blanco Cabie.
Pormal a naluktan ti kombension babaen ti makainspirar a panagsarita ni Presidente Baldovino Ab. Valdez. Ken intarapnosnan a pinasangbay dagiti delegado gapu iti kaawan ni Rogie C. Baysa a sekretario heneral ti GUMIL Filipinas a napusgan itoy nga akem.
Kalpasanna, naipabuya ti ”Kannawidan a Sala” babaen dagiti mangisursuro iti Currimao District a kameng ti GUMIL Ilocos Norte. Saan met a nagpaatiw ni Fely Cristobal ti GUMIL Hawaii. Makaalino ti panagkinnina iti panagsalana iti hula.
Anian a pannakaray-aw ti tallaong. Aglalo pay a nalaing dagiti mangiturturong iti programa a da Jovito Amorin ken Aida Tiama.
Ket gapu iti pasnek dagiti delegado nga agiinniliw, agbuya, ken agdengngeg iti lektiur, nagistay awanen ti makalagip iti nakadasar a pangngaldaw!
Nangruna la ngaruden idi marugian a mayam-ammo dagiti aglektiur a matangtangad iti bukodda a tay-ak.
Ni Judge Vivenvio S. Baclig ti nangyam-ammo ken ni National Artist Francisco Sionil Jose. Trinatar ni Apo Sionil Jose ti nadumaduma a teknik ti panagsurat ken, kangrunaanna, ti panagilibro kadagiti naapiten nga obra maestra.
Ni met dati nga Editor-in-Chief ti Bannawag ken dati a presidente ti GUMIL Filipinas Diony S. Bulong ti nangyam-ammo ken ni Apo Zac Sarian, a pada ni Apo Sionil a Ramon Magsaysay Awardee. Isu ti editor ti Agriculture Magazine nga ipabpablaak ti Manila Bulletin ken kolumnista ti nalatak a ”Padasem Daytoy, Kailian” iti Bannawag. Trinatarna met ti umno a panagpatubo ken panangtaripato kadagiti de-kalidad a kayo ken dadduma pay a banag a mainaig iti agrikultura.
Kalpasan ti nabaknang a pangngaldaw ken panagpalpa iti namayengmeng a hardin, naituloy ti lektiur.
Inyam-ammo ni Aida Tiama ni Dr. Paul Zafaralla ti Unibersidad ti Filipinas a naglektiur maipanggep iti panagkritiko— manipud kanta agingga iti daniw. Ket, ne, maysa manen a taga-Hawaii, ni Rose C. Daproza nga asawa ni Brigido Daproza, ti nangipaneknek ti laingda a taga-Hawaii nga agdaniw.
Ni Ron Bryant, maysa a direktor ken award-winning Indie Filmmaker ti simmaruno a naglektiur. Ni met Ariel Tabag ti nangyam-ammo. Naggapu gayam kadagiti Bumatay iti La Union. Trinatar ni Bryant ti panagaramid iti pelikula a bassit ti badyetna ken panagakem ti drama iti entablado. Napasnek dagiti delegado a nagdengngeg ken nakipartisipar iti lektiur ta iti puotmi, immuna daytoy iti pakasaritaan ti GUMIL.
Naiballaet kalpasanna ti panagdaniw met ni 2006 Bucaneg Awardee ken DepEd Supervisor ti San Nicolas, Pangasinan District Fernando B. Sanchez. Nalimbong ti bosesna, a kasla agkunkuna: ”Saan la a dagiti taga-Hawaii ti dumadaniw.” Napalalo a palpalakpak dagiti agbuya.
Ni met Madam Elizabeth M. Raquel, presidente ti GUMIL Ilocos Norte ken District Supervisor ti DepEd, Currimao District ti nangyam-ammo ken ni Dr. Abercio V. Rotor. Saan la gayam a nalaing nga aglektiur ni Dr. Rotor. Nalaing pay nga agbiolin! Pagsangsangitenna ti biolinna bayat ti panangkumpas ti balasangna iti organ.
Innala met dagiti mangiturturong iti programa dayta a gundaway a nagpa-raffle. Ti premio ti mabunot: lima gasut a pisos nga aggapu ken ni Judge Baclig ken maysa a botelia ti pang-eskport a basi a partuat a mismo ni Dr. Rotor.
Simmaruno ti panagdaniw ni Honor Blanco Cabie, dati a Presidente ti GUMIL Filipinas. Kas ken ni Apo Sanchez, nakatibtibong met ti bosesna ket saan a nakakaskasdaaw nga agpadada a nakoronaan kas Saribitniw King.
Iti pannakalinglingay ti tallaong, nagistayan la ket ngarud manen awan nakalagip iti oras ti panangilabban. Ngem sakbay a nabatingting ti kampana iti kosina, naangay ti workshop iti sarita ken daniw. Da Jose A. Bragado, dati a presidente ti GUMIL Filipinas, Manuel S. Diaz, ken Juan Al. Asunsion dagiti nagpaay a panelist iti workshop iti sarita. Ni met Juan S.P. Hidalgo, Jr. ti nangiturong. Iti met benneg ti daniw, panelist da Guillermo I. Concepcion, Joel B. Manuel ken Daniel L. Nesperos. Ni met Honor Blanco Cabie ti moderator.
Kalpasan ti pangrabii, impamatmat manen dagiti kameng ti GUMIL Ilocos Norte ti laingda a sumala kadagiti kannawidan a sala. Kimmanta met ti dua kadagiti kameng ti Samtoy, ti Tagalog a pagluganada. Nakoronaan met ti Miss GUMIL Filipinas 2009 ken ti mutia ti GUMIL Hawaii. Dinaniwan ida ni Guillermo Concepcion.
Naisaruno ti pannakapadayaw dagiti mabigbig a mannurat a kas kada: (+) Col. Lorenzo Ilustre, Sr. (Pamulinawen Awardee 2009); Marlene J. Tolentino (Bannatiran Awardee 2009), Elizabeth Madarang Raquel Leona Florentino Awardee 2009, ken Pedro Bucaneg Awardee 2009, Dr. Aurelio S. Agcaoili.
KABIGATANNA, Abril 12, ti pannakaangay ti eleksion ken pannakayawat ti premio dagiti nangabak kadagiti nadumaduma a pasalip iti panagsuratan.
Da Honor Blanco Cabie, Dionisio S. Bulong ken Judge Vivencio S. Baclig a nangisuno ken ni Reynaldo A. Duque ti nangimaton iti pannakaiwayat ti eleksion.
Indauluan ni Elizabeth Raquel dagiti nangabak a mangrienda iti GF iti Mayo 2009 agingga iti Abril 2011.
Kalpasan ti pangaldaw, nayalnag dagiti nadumaduma a libro a pakairamanan ti Sabong ti Biag a nobela ni 2008 Pedro Bucaneg Awardee Francisco T. Ponce babaen ti panangedit ni Bannawag Editor Cles B. Rambaud.
Adda 20 a kopia ti Sabong ti Biag a naibunong a libre kadagiti nadumaduma a libraria.
Kalpasan ti panangrikep ni nabutosan a Presidente Elizabeth Madarang-Raquel iti dua nga aldaw a kombension, nagiinnunan dagiti dadduma a delegado a nagaawid.
Ngem siak, saanak a nagdardaras. Sinaggaysak a pinasiar dagiti pasdek a pinaliiwko sakbay a simmangbayan ti GUMIL. Nadalimanek latta gapu iti kinaalibtak dagiti seminarista nga agdalus. Kasla awan namalbaliwanna. Ngem napaliiwko, adu ti namalbaliw kadagiti simmangbay ken nagtalaw— a pakairamanak.
(Adtoy ti kompleto a listaan dagiti delegado: GUMIL Metro Manila: Rey Duque, Leo S. Fagaragan, Simeon Berroy, Zita Fagaragan, Ariel Tabag, Aida Tiama, Sherma Benosa, Jake Ilac, Ma. Rose Cabie, Honor Blanco Cabie, Martin Rochina, Virgilio Tabugadir, Jovito Amorin, Ross Derit, Ansel Cargo, Dionisio Bulong, Andy Cocson, Eden Bulong, Cecilio Tenoso, Cles Rambaud, Mighty Rasing, Dexter Biz, Angelo Padua, Tessie Duque, Juan S.P. Hidalgo, Jose A. Bragado, Juan Al. Asuncion, Judge Vivencio Baclig;
GUMIL Isabela: Baldovino Valdez, Franklin Macugay, Aurelio Battad, Peter La Julian;
GUMIL Nueva Vizcaya: Manuel Benosa, Ruperto Manuel, Amadeo Dulay;
GUMIL Ilocos Norte: Elizabeth Raquel, Mario Tejada, Rosario Bingayen, Leonardo Agunoy, Zaldy Fernandez, Jorge Placido, Avelina Fe Camacho, Fiel Camacho, Mila Sagadraca, Rolando Tubera, Efren Inocencio, Aileen Rambaud, Ludilyn Bravo, Adoracion Salentes, Marcelita Buyat, Michael Fernandez, Zenaida Antonio, Rowena Bandiola, Jane Valdrez, Guillermo I. Concepcion, Daniel L. Nesperos, Joel B. Manuel, Arnold Pascual Jose;
GUMIL Pangasinan: Fernando Sanchez, Prescillano Bermudez, Luz Macaraeg, Raquel Torres, Eufemia Diaz, Manuel S. Diaz, Virgilio Domaloy;
GUMIL Ilocos Surw: Freddie Lazaro, Constante Balanza, Stephen Balanza, Rodie Taan, Ben Pacris, Crisostomo Ilustre;
GUMIL Cagayan: Arthur Urata, Constante Ancheta, Ronnie Aguinaldo;
GUMIL La Union: Errol Abrew, Danilo Caburian, Pablito Alcantara;
GUMIL Baguio-Benguet: Claire A. Sumahit;
GUMIL Hawaii: Pacita Saludes, Rose Daproza, Remedios Baclig, Felicitas Cristobal, Andrea Mendoza, Gloria Raquedan, Rosendo Raquedan, Erlinda Bautista, Rosenda Cariaga;
DepEd Ilocos Norte: Lea Fernando, Novi Krishna Suga, Mark Limon;
Ken dadduma pay: Artemio Raguindin, Lita Raguindin, Norielyn Tabag, Jo Carmeline Rambaud, Rhojoesa Bingayen, Benny Sanchez, Eljie Urata, Lydia Saludes-Ramiro, Rheo Domingo, Aureliano dela Cruz, Mila Aguirre, Alma Martinez, Patrocino Virtudez, Fred Ilac.)#