Ni CONSTANTE P. ANCHETA, DPA

GUMIL Cagayan

 

SIMREKAK itay nabiit iti seminario. Saan a tapno sumarungkar wenno agadal. Awan ti am-ammok tapno komustaek koma. Ganggannaetak ngarud iti seminario a sinerkak, ti Our Lady the of Angels Seminary (OLAS), Novaliches, Quezon City.

 

Ngem saanen idi rummuarak. Ta iti las-ud ti dua nga aldaw, manipud Abril 11 agingga iti Abril 12, 2009, maysa ‘toy numo kadagiti baro a pagayam a naam-ammo, nagkameng iti Gunglo dagiti Mannurat nga Ilokano iti Filipinas ken Ballasiw-taaw wenno GUMIL. Naibilangak kadagiti sumurok-kumurang a sangagasut a miembro a nagrehistro iti pannakaangay ti maika-41 a kombension nasional ti GUMIL.

 

Saanen a baro kaniak ti GUMIL. Kinapudnona, kaeskuelak idi iti UST dagiti sumagmamano a miembro a kas kada Appo Manuel Diaz, Ed Angco, Leonardo Belen, kdpy. Naitungtungkua ti ayatko a makikadua kadakuada agingga a nalipatak. Nupay kasta, masaysayanganak no damagen dagiti kaprobinsiaak iti Cagayan, nangruna dagiti kalugarak ditoy Tuguegarao ti saanko a pannakikameng iti maysa a tsapter daytoy. Nangruna no maangay manen ti tinawen a kombension.

 

Agsipud ta awanak metten iti sirkulasion ti gobierno, kunak a gundawayen nga agmiembroak iti GUMIL. Saan pay met siguro a naladaw. Total adda met sumagmamano a naipablaak a sinuratko iti Liwayway ken Bannawag. Adda pay kadagiti lokal ken sumagmamano a nasional a pagiwarnak.

 

“Welcome to Club, Manong Tante,” kuna a dagus ni Apo Arthur Urata, ti presidente ti GUMIL Cagayan. Isut’ gapuna nga iti nasao a kombension nasional, nagmiembroakon.

 

NO puon ti kayo koma, narangpayan ti GUMIL. Nangruna no nataba ti daga a nakaimulaanna. Rakepen koma itan ti kadakkel ti puon daytoy. Ken nakataltaleken ti takder ken tayagna. Saanen a mailibak ti panagduyos dagiti tumatayab nga aglilinnemmengan kadagiti natibker a sanga ken aringgawis tapno mapasam-it ti lovelifeda. Agumokda. Matimud dagiti makakayaw a kanta ken sagawisiwda nga ipallais ti pul-oy sipud pay idi sumagpat ti nadagaang nga Abril ken Mayo. Saksi ti pinuon iti panagbaliw ti panawen: panagtutudo, sa kalgaw manen. Makakayaw ti kayo, nangruna no buklen daytoy ti ad-adu pay a pinuon tapno masao kas bakir.

 

Saan la ketdi a matukod dagiti adu nga imbag nga ipaay dagiti kayo ti bakir iti biagtayo. Lapdanda ti dagus a panagreggay, kasta met a pabaknangenda ti daga. Agtalinaed a nalamiis ti aglawlaw uray pay no agmatuon. Agummongda kadagiti tudo sadanto in-inut nga iruar kas ubbog wenno burayok. Agayus dagitoy tapno ikkanda iti naan-anay a biag dagiti karayan, waig ken dadduma pay a taudan ti danum.

 

Saan la a dayta. Sagepsepen dagitoy ti makuna a carbon dioxide a pataud ti tao a mangrugit iti angin, danum, ken daga. Ngem babaen ti nakaskasdaaw a kabaelan ti kayo, innawan wenno ugasanna dagita a polusion. Usarenda a pangpartuat iti taraonda ket sumngaw ti oxygen a kasapulan met nga angsen ti tao tapno agbiag.

 

Kasta ti kayarigan ti GUMIL itan. Narangpayan ta magaw-atna payen ti ballasiw-taaw. Adun dagiti pinalatak daytoy a mannurat. Ad-adunto pay dagiti sumaruno. Mabigbigen iti kagimongan. Naan-anayen ti langa, takder ken kabaelanna. Gumilgil-ayaben iti kinalatakna. Makatulongen daytoy a mangmuli ti kapanunotan sosiodad. Mabalin itan a denggen dagiti gakat daytoy nangruna dagiti tao ti gobierno tapno makatulong iti sosio-ekonomiko a panagdur-as ti biagtayo nga umili nangruna iti deppaar ti Amianan.

 

Malaksid no biddut, saan met siguro a mababalaw ti asino man a miembro ti mangisingasing kadagiti addang a mabalin a makatulong iti pagsayaatan ti GUMIL. Ngamin adda dagiti nadlawmi a nasken koma nga ikalendario tapno ipatungpal ti gunglo. Kas koma ti agtuloy a panagtalinaed ti miembro. Gumilgil-ayab, saan a panagkupas ken regget a mangpapigsa ti organisasion. Dagiti naindayawan a pakalaglagipan a pasamaken babaen ti ad-adu pay a salip iti panagsurat. Seminar tapno maasa kadagiti baro/agngayangay a mannurat. Pannakabigbig ti gapuanan dagiti miembro babaen ti pannakaipablaak ti sinuratda. Iti kasta, lalo nga umadu ti miembro ket agsubli wenno maki-GUMILto manen ni mannurat. Siguro no adda mangipinget, nangruna dagiti pannakaadigi ti gunglo ken wenno irusat daytoy dagiti mabigbig/premiado nga Ilokano a mannurat, maipasdek iti napudpudno a GUMIL magazine/pagiwarnak. Agsubskribir ti tunggal miembro. Mairaman nga ilako kadagiti newsstand. Nayon a pundo.

 

Mabalin nga agbinulan. Iti kasta, adda pakaimalditan pay dagiti gapuanan dagiti mannurat. Ket tinawen a mailibro dagitoy a gapuananda. Maipelikula kas ti narugianen ni Apo Juan S.P. Hidalgo, Jr. Mabalin koma pay a regular a maipablaak iti Internet tapno mabasa/maammuan dagiti ad-adu pay a tao ditoy Filipinas ken sabali a pagilian a pakasarakan dagiti pada nga Ilokano. No matuloy a kasta, ad-adda ngarud a maawis ti rikna ni mannurat nga agtalinaed ken mangipabigbig nga isu ket naan-anay a miembro ti GUMIL.

 

 

Maysa pay a singasing, a makunam a dakkel la ketdi ti kaitutopanna: ti panangkablaaw iti tunggal kameng kadagiti naisangsangayan nga okasion wenno pasken a napateg iti biagna kas iti panagkasangay, anibersario, kdpy. Usaren ti selpon, telepono, kdpy.

 

Awan surok ken kurangna, bigbigen ti nairugin ken nagapuanan dagiti immunan a nagtaken ti GUMIL. Mayat dagitoy. Nangngegmi ket addan lote a pakaipasdekan ti Balay ti GUMIL. Adda ken adu ti mayat nga esponsor kadagiti kakasta a gakat a maisayangkat.

 

Pagsasaritaan koma ngarud dagitoy agraman dagiti dadduma pay a gapuanan ken gakat no dumtengto manen ti kombension nasional. Saan koma nga umanay nga adda mangngeg a lektiur. Pannakaiparang koma met dagiti napasamaken iti uneg ti GUMIL babaen ti slide shows.

 

Adda koma met door prizes, raffle draws. Makatulong dagitoy tapno saan a matektekan dagiti maki-convention. Adda koma dagiti souvenir a mainaig iti GUMIL. Iti kasta, adda met ipakpakita/maipakitatayo ken/wenno yawid kas sagut dagiti taga-ballasiw-taaw, yantangay adda met awitda no umayda makiinniliw. Saan met siguro nga agtalinaed lattan a kasla class reunion no agkikita da Gumiliano ken Gumiliana?

 

Nagsayaaten, aya, ti agarapaap. Mabalin a narigat nga irugi dagiti nadakamat a gannuat. Mabalin met a saan. Ngamin adda makunkuna nga individual differences wenno pakakumikoman ti tunggal maysa: agduduma a panirigan iti biag ken kayat a suroten a dalan.

 

Narangpayan ti GUMIL. Naan-anayen a pinuon iti tawenna nga uppat a pulo ket maysa. Pannaripato ti kasapulan tapon agtalinaed ti ngayedna.#