Baro a Rikna ken Namnama Para iti Literatura Ilokana
DAYTOY ti tema a mawarwar iti pannakabangon ti Balikas a nairidep iti nabayag a tiempo. Kayariganna iti nanglaylay a mula a kalpasan a napasayakan dagiti ramutna iti bayakabak, in-inut a simmantak dagiti bulongna.
Ibilangtayo a ti Balikas ket isu ti Literatura Ilokana. Inikkantayo iti Baro a Namnama ken Rikna tapno iti kasta makaungar ket makapagserbi manen kadatayo a mangipatpateg kenkuana.
Saan a mabalin a makeltay iti panagsantakna. Agtutunostayo koma a mangsukay iti puonna tapno ad-adda nga agramaram dagiti ramutna. Ket iti kasta, mapantayo amin aglinong kadagiti agsalumpayak a sanga ken bulongna.
Kas kabarbaro ita a mangipangulo ti GUMIL Filipinas, naipakumit daytoy a banag kaniak: ti pannakabangon ken isasantakna. Ta rebbengen a talaga ti GUMIL Filipinas a mangtaginayon iti Balikas, nga opisial a pagiwarnakna, ken ti pannakataginayon ti lengguahe agraman iti pannakapapigsa ti pundasion ti Literatura Ilokana.
Rebbengna a di maiddep ti namnamatayo. Mulien ti kaunggantayo ti namnama, ibaklaytayo a sangapada agingga a maipuestotayo iti umno a pagyananna a sirigentayo ken dagiti sumarsaruno a kaputotan.
Iti panagsapatami nga opisial ti GUMIL Filipinas itay Mayo 10, 2009 iti Sangguniang Bayan Session Hall ti Currimao, inimatangan dagiti dua a patron ti Literatura Ilokana, da Mayor Rosario Chua-Go iti Currimao, ken Dr. Cecilia Pacis-Aribuabo, CEO IV, agdama a DepEd, Schools Division Superintendent ti Division of Ilocos Norte ken kabsat ni Apo Donel B. Pacis, premiado a mannurat iti Iluko ken Ingles.
Iti panagsarita dagitoy dua a mangipatpateg iti lenguahe ken Literatura Ilokana, impeksa ken intukitda iti nasao nga okasion ti Baro a Namnama ken Riknada a mangitag-ay iti naranraniag a masakbayan ti Literatura Ilokana.
Kinuna ni Mayor Rosario Chua-Go a no kasapulan ti GUMIL Filipinas ti tulongna a pakaseknan iti panagdur-as ti GUMIL, masindadaan daytoy a mangyarayat kadagiti imana.
Imbitla met ni Dr. Cecilia Pacis-Aribuabo: “Nasinged unay ti riknak iti GUMIL agsipud ta maysaak met a mannurat iti Iluko. Kinapudnona, napatpateg ngem balitok ti literatura ken lenguahetayo kaniak. Kas pammaneknek, indariragko kadagiti amin a distrito ti Ilocos Norte iti panagsuskribir dagiti amin a pagadalan nga adda iti babaenda iti Bannawag tapno ad-adda a mayasideg kadagiti agtutubo ti kinapateg ti pagsasaotayo nga Iluko!”
Nagpintas ketdin dagitoy nga imbalikas dagiti dua a patron ti Literatura Ilokana.
Makapalukmeg iti puso! Ken makapadakkel iti lapayag! Isuda ti baro a namnama ken rikna iti pannakapasantak ti intukittayo a bukel ti Literatura Ilokana!
Saantayo ngarud nga agmaymaysa, adu dagiti kakaduatayo a mangiduron iti pilid ti Literatura ni Saluyot. Patientayo daytoy a pagsasao a no adda kammayet ken panagtitinnulong, awan ti gapuna a di agbalikas dagiti arapaaptayo para iti nabakbaknang a Literatura Ilokana.