Luktanna Dagiti Ridaw ken Tawa ti GF
AGBALIKAS manen ti Balikas, kalpasan ti innem a tawen a panagumelna. Maysa daytoy kadagiti umuna nga addang ti baro a liderato para iti temana a “Baro a Rikna ken Namnama Para iti Literatura Ilokana”.
(Nairuar ti Balikas idi 1999 iti babaen ti liderato ni Apo Jose A. Bragado.)
Maysa kadagiti kari ti baro a liderato ti transparency wenno panangilukat ti GUMIL Filipinas kadagiti ridaw ken tawana kadagiti kamengna. Masapul a maipatan-aw ken maipaamiris kadagiti kameng dagiti tignay ken gannuat ti liderato kasta met dagiti nadumaduma a dokumento a pakainaigan ti gunglo.
Ngarud, daytoy Balikas— agraman ti kabsatna a gumilfilipinas.com, ti website ti GF a mayalnag met itoy Agosto 23— ti agbalin a rangtay iti nagbaetan ti liderato ken dagiti kameng.
Malaksid kadagiti putar dagiti mannurat a kameng ti GF, kangrunaan a laonen ti Balikas dagiti damdamag, ladawan, dokumento, rekord mainaig kadagiti panggep ti agdama a liderato ken dagiti nadumaduma a chapter ti GF, ken dagiti maitultuloy a gannuat ti GUMIL Filipinas manipud iti pannakabuangayna idi Oktubre 1967.
Ikagumaan ngarud ti Balikas ti agbalin a napudno iti naganna: ti mangipakaammo kadagiti gannuat ti liderato kadagiti kameng. Kasta met a babaen ti Balikas, maipakaammo dagiti kameng dagiti singasingda iti liderato para iti nasansantak ken nadurdur-as a GUMIL Filipinas.
Maysa kadagiti pagilasinan a sibibiag ti maysa a gunglo no adu dagiti proyekto wenno pakakumikomanna. Ngem saan a naan-anay no dagitoy a proyekto, agtalinaed a palimed, no saan a maipakaammo kadagiti kameng. Ngarud, no saan nga ammo dagiti kameng dagitoy a pakakumikoman, maibilang a di umang-anges ti gunglo.
No ar-arigen, kasla panagbuniag manen daytoy ti Balikas— isu ngarud a mayalnag manen. Agdalan manen iti kinamaladagana; agdalan manen iti panagsursurona a magna ken agbalikas.
Iti ababa a pannao, kasapulanna ngarud dagiti mangaw-awir, dagiti mangatibay, dagiti mannursuro. Dakkel a pagyamanan dagiti mangimaton ti ania man a saranay: donasion wenno anunsio.
Mapadayawantayo ta itoy a pannabuniagna manen iti sirok ti latok, ni Apo Avelina Fe Camacho ti nagbalin a ninangna (nangigasto iti panagbuniagna manen).
Ngem kas nakunan, saan laeng a ninang ti kasapulan ti Balikas. Makatulongtayo amin a kameng ti GUMIL Filipinas tapno dumakkel ken tumaeng ti Balikas ket agbalin a naandur ken naanep a para lukat iti ridaw ti GUMIL Filipinas, kasta met a mensahero dagiti amin a Gumiliano ken Gumiliana.#