Daytoy ti waya ti komunikasion ti liderato ti GUMIL Filipinas kadagiti kameng ti gunglo. Proyekto ti Editorial Committee ti GUMIL Filipinas, malaksid a papartakenna ti pannakaiwaras ti impormasion ken komunikasion ti gunglo— katinnulongna ti GF website— ti Balikas, ti mangipablaak kadagiti amin nga aktibidad, pasamak ken pangpanggepen ti GF, ken dagiti maipagpannakkel a gapuanan dagiti mannurat nga Ilokano.

1.Laonenna dagiti amin a pasamak maipanggep kadagiti aktibidad ti GUMIL Filipinas; damdamag manipud kadagiti nadumaduma a chapter ti gunglo; ken, dagiti orihinal, di pay naipablaak iti ania  man a babasaen ken Internet, a sinurat dagiti ken mainaig kadagiti mannurat, kangrunaan dagiti kameng ti GUMIL Filipinas.

2. Maipablaak iti maminsan iti tunggal tallo a bulan. Maigiddan ti iruruarna iti regular a miting ti GF Board. Maiwaras a libre kadagiti readers, maipangruna ketdi dagiti kameng ti GUMIL Filipinas (in good standing), babaen dagiti chapter president.

3. Maipatulod dagiti sinurat kadagiti editor babaen ti gumil.filipinas@gmail.com, ti opisial nga e-mail ti agdama a secretariat dagiti amin a material (teksto, ladawan); wenno personal nga idatag kadagiti kameng ti staff ti Balikas. Iti biang ti anunsio, kalpasan a matinong iti Tesorera ti GUMIL Filipinas, ipatulod ti marketing manager ti material para iti anunsio kadagiti editor babaen ti e-mail iti ngato, tapno mailay-out.

4. Irekord ti Balikas dagiti aktibidad ti gunglo babaen ti teksto ken ladawan. Iti sabali a pannao, tumulong daytoy nga agidokumento kadagiti mapaspasamak/napasamaken nga aktibidad ti GF.

5. Maipablaak ti Balikas babaen ti maur-or a pundo a maala iti anunsio ken babaen ti donasion (para iti detalye ti anunsio ken donasion, agimtuod iti e-mail iti ngato).

6. Dagiti editor ti mangpili ken mangedit kadagiti maipablaak nga artikulo, sarita, daniw, damag ken amin a laonen ti pagiwarnak. Dagiti marketing manager ti agawis kadagiti anunsiante ken donor para iti pagiwarnak. Nawaya dagiti kameng ti GUMIL Filipinas, ken uray dagiti saan a kameng, a mangidatag kadagiti sinuratda. Karbengan dagiti editor ti mangipablaak ken di mangipablaak kadagiti naawat a sinurat. Saan (pay laeng) a mabayadan dagiti maipablaak a sinurat.

[Translate]

powered by