GUMIL Filipinas, Inc.

Gunglo Dagiti Mannurat Nga Ilokano Iti Filipinas, Inc.

(Ilocano Writers Association of the Philippines, Inc.)

Manila Secretariat, c/o Bannawag, Manila Bulletin Publishing Corporation,

Intramuros, 1002 Manila

S.E.C. Reg. No. A200118844 / Tel: (02) 400-0089; E-mail: gumil.filipinas@gmail.com; Website: www.gumilfilipinas.com

RESOLUSION TI HUNTA DIREKTIBA A MANGIPEKSA ITI LADINGIT

ITI IPUPUSAY TI DATI A PRESIDENTE, DR. GODOFREDO S. REYES

(1976-1989), TEDDEK TI LITERATURA ILOKANA KEN LAUREADO

A MANNANIW TI KAILOKUAN

RESOLUSION BILANG 09-002, s. 2009

AGSIPUD TA, ti Presidente ti Gunglo Dagiti Mannurat nga Ilokano nanipud 1976 inggana’t 1989, agdama a Laureado a Mannaniw ti Kailokuan ken nakagun-od idi 1990 iti Pammadayaw Pedro Bucaneg nga ipapaay ti gunglo, napanen iti sabali a biag;

AGSIPUD TA, dakkel a pukaw ti gunglo ken dagiti mannurat nga Ilokano, agsursuratda man iti Iluko wenno sabali a pagsasao, ti ipapanaw ti mabigbigbig a teddek ti Literatura Ilokana ken taklin dagiti adu a mannurat, napudno a kabsat, ama ken uliteg, naayat a tumulong kadagiti mannurat nga Ilokano, bangolan man wenno agdadamo;

AGSIPUD TA, gapu ti kinabaknang ken kinaadu dagiti imparaburna a lagip ken gapuanan kasta metten dagiti apit para iti nalawa a sarusar ni Samtoy, patinayonto latta a sibibiag ni Dr. GODOFREDO S. REYES iti puso ken panunot dagiti mannurat nga Ilokano;

AGSIPUD TA, nasin-aw dagiti impakitana nga aramid, ti moralidad ti lideratona iti gunglo kas nangrienda, namagbaga ken pangamaen, malaksid iti panangpatibkerna kadagiti addaan pay laeng ganus a muging dagiti in-inaudi a kaputotan dagiti mannurat;

AGSIPUD TA, di magatadan ti kinadakkel ken naisangsangayan a gapuananna a nangpabaknang iti Literatura Ilokana babaen dagiti pananglukatna kadagiti ridaw a pagserkan dagiti mannurat nga Ilokano, kas iti panangyuna ken pannakibinnulig iti panagdur-as ti Literatura Ilokana, maibilang ditoy ti inna inrusat a pasalip iti avant-garde poetry iti mano a tawen;

AGSIPUD TA, kas mannakaawat ken managparbeng nga ama ti gunglo wenno uray idin isu daytay kangrunaan a pangamaen dagiti GUMILiano ken GUMILiana iti pagilian ken ballasiw taaw, naimpusoan a tinawen a pinaspasangbayna dagiti mannurat nga Ilokano iti bukodna a ligason iti Suso Beach iti ilina a Santa Maria, Ilocos Sur tapno sadiay mapagtutungtonganda no kasano a palasbangen ti Literatura Ilokana;

AGSIPUD TA, kas Laureado a Mannaniw ken nakagun-od iti Pammadayaw Pedro Bucaneg, impamatmat ni DR. GODOFREDO S. REYES, ti nakayanakanna a talugading ken kinapakumbaba, birtud nga iti inna nagpulpuligosan a gimong manmanon a maanninawan, agraman payen ti kararua ti kultura ni Ilokano a nangtulong pannakabukel ti parmata ni Samtoy;

AGSIPUD TA, uray idin ta saan a makaat-atendar kadagiti nailian a kombension ti gunglo, adda latta ti puso ken panunotna, makibaetbaet kadagiti in-inaudi a mannurat nga agtamtamed ken agraraem kenkuana, tumultulong latta ket saanto dayta a masubadan kas manen iti awan sekkad a tulongna itay kombension ti gunglo ‘diay Our Lady of the Angels Seminary iti Novaliches, Siudad ti Quezon itay napan a kalgaw;

AGSIPUD TA, iti panagdaliasatna ditoy a biag imparangarangna kadagiti padana a mannurat nga Ilokano ken sabsabali pay nga inna nakasinniko ken nakasarsarita nga isu ket ubbog ti kinasayaat, addaan awanan rasina nga integridad, addaan batonsileng a dignidad, addaan napasnek ken naanep a pannakitinnulong kadagiti makasapul;

AGSIPUD TA, bilang maysa a GUMILiano mismo, inrakurakna iti gimong ti kinatangkirang ken kinatao ni Ilokano a mannurat, rumbeng a maikkan iti respeto ken raem kas nabisked a paset ti gimong ti dakdakkel pay a pagilian;

AGSIPUD TA, nasalun-at dagiti pampanunot ken rikna nga inna impakita ken impasimudaag kadagiti nagpuligosanna iti gimong: kas maysa nga awanan sikorna a mangngagas, nasaldet a politiko, mannakaawat nga edukador, nangipatpateg iti ilina kas maysa a geriliero, ama dagiti mannurat a GUMILiano ken GUMILiana, kasta metten a nabisked ken sindadaan a sanggir a kapisi ti puso ni Dr. DEDICACION AGATEP-REYES;

AGSIPUD TA, iti puso ken panunot dagiti opisial ken kameng ti GUMIL Filipinas, sibibiagto latta ni Dr. GODOFREDO S. REYES a taklin ken inda ipatpateg;

NGARUD, RESOLBAREN TI HUNTA DIREKTIBA TI GUNGLO, kas panangresolbarna ita, ti pannakipagladingitna iti kapisi ti puso ni Dr. GODOFREDO S. REYES, ni Dr. DEDICACION AGATEP-REYES, ken dagiti nasinged a kakabagianda, ken iti sibubukel a Gunglo Dagiti Mannurat nga Ilokano iti Filipinas, ken panangbigbig iti dinto agkusnaw a gapuanan ni Dr. GODOFREDO S. REYES, iti Literatura Ilokana, ken inna panangikararag nga awaten koma ti Manangngaasi nga Ama ti anakna a nangibukbok iti puso, panunot ken kararuana bayat panagdaliasatna ditoy rabaw ti daga.

RESOLBAREN PAY ti Hunta Direktiba ti panangited iti kopia daytoy a Resolusion ken Dr. DEDICACION AGATEP-REYES, ket mangibati met iti maysa a kopia nga idulin ti gunglo.

Naaramid ita, maika-11 ti Hulio, 2009.

Iti pammilin ti Hunta Direktiba:

ARIEL S. TABAG

Sekretario Heneral, 2009-2011

Pinasingkedan ni:

ELIZABETH M. RAQUEL

Presidente, 2009-2011

[Translate]

powered by